लेखनाथ, १५ पुस । १८ औं संस्करणको लेखनाथ महोत्सवमा आज ३५ हजार दर्शकले अवलोकन गरेका छन् । पुस ७ गतेदेखि सुरु भएको महोत्सवको नवौं दिन आज करिब १ करोड ३० लाखको कारोबार भएको प्रचारप्रसार संयोजक राजेन्द्र ओझाले जानकारी दिएका छन् ।
आज सार्वजनिक बिदा परेकाले दर्शकको उल्लेखनिय सहभागिता भएको उनले बताए । भोलि पनि बिदा रहेकाले दर्शकको राम्रो उपस्थिति रहने आयोजकको अपेक्षा छ। पुस ७ गतेदेखि सुरु भएको महोत्सवको आठौं दिनसम्म आइपुग्दा कुल २ लाख दर्शकहरुले अवलोकन गरेको प्रचारप्रसार संयोजक ओझाले जानकारी दिए ।
महोत्सवको पहिलो दिन ३० हजार दर्शकले अवलोकन गरेका थिए भने दोस्रो दिन पुस ८ गते १० हजार, पुस ९ गते २५ हजार, १० गते ३० हजार, ११ गते १५ हजार, १२ गते १५ हजार, १३ गते २०, १४ गते २० हजार र १५ गते ३५ हजार गरी कुल २ लाख दर्शकले अवलोकन गरिसकेका छन् ।
त्यस्तै, महोत्सवमा हालसम्मको कुल कारोबार रकम ८ करोड नाघेको छ । महोत्सवमा पहिलो दिन पुस ७ गते ८० लाख, ८ गते ४० लाख, ९ गते १ करोड, १० गते १ करोड २० लाख, ११ गते ७० लाख, १२ गते ८० लाख, १३ गते १ करोड, १४ गते १ करोड र १५ गते १ करोड ३० लाख गरी कुल कारोबार रकम ८ करोड १० लाख पुगेको संयोजक ओझाले जानकारी दिए ।
महोत्सवमा सोचेभन्दा बढी दर्शकको साथ मिलेको प्रचारप्रसार संयोजक ओझाले बताए । महोत्सवमा मनोरञ्जनका लागि दैनिकजसो रत्यौली कार्यक्रमदेखि विद्यालय स्तरीय कार्यक्रम, लोकदोहोरी कार्यक्रम, भजन कृतन, लाइभ कन्सर्ट, विभिन्न जातजाति, भाषाभाषीका कार्यक्रमहरु भइरहेका छन् ।
आज भएको लोकदोहोरी कार्यक्रमतर्फ गायकहरु राजन गुरुङ, राजु गुरुङ, रामजी पौडेल, गगन गुरुङ गायिकाहरु जलुमाया गुरुङ, रीया खड्का, रतिमाया खड्का र पारु गुरुङको प्रस्तुति थियो भने, हाँस्यव्याग्य तर्फ राजेन्द्र गिरी (कुन्दुके जादूगर), मिना गिरी र संसारकै होचा मनोज गोर्खालीको प्रस्तुति थियो । त्यस्तै, लाइभ कन्सर्टतर्फ छेवाङ लामा, राजेन्द्र वर्देवा र प्रिया गुरुङको प्रस्तुति थियो ।
त्यस्तै, शनिबार हुने लोकदोहोरी कार्यक्रमतर्फ श्याम राना, शिवहरि ढुंगाना, अमृत सापकपोटा, प्रिन्स लम्साल गायिकाहरु कमला घिमिरे, निशा पोख्रेल, आशा विसी, मधु चापागाईंको प्रस्तुति रहनेछ । त्यस्तै, हाँस्यव्यांग्य तर्फ सापटी काका र घिरौलाको प्रस्तुति रहने भएको छ । त्यस्तै, साँझको लाइभ कन्सर्टतर्फ राजेश पायल राई, बसन्त सापकोटा, अनु चौधरीको प्रस्तुति रहनेछ ।
महोत्सवमा प्रत्येक दिन विभिन्न क्षेत्रका विशिष्ट व्यक्तिहरुले अवलोकन गरिरहेका छन् । आज कांग्रेस सहमहामन्त्री जीवन परियार, कास्कीका प्रमुख जिल्ला अधिकारी, सहायक प्रमुख जिल्ला अधिकारी, अनुसन्धानका एसपी, गण्डकी प्रदेश उद्योग वाणिज्य महासंघका उपाध्यक्षलगायतको टिम, स्याङ्जा उद्योग वाणिज्य संघका पदाधिकारीहरु, म्याग्दी उद्योग वाणिज्य संघका पदाधिकारीहरु, विजयपुर व्यारेकका पृतनापतिलगायतको टिम, नेकपा एमालेका प्रदेश जिल्ला र नगर स्तरिय नेताहरु,नेपाली कांग्रेसका नेताहरु, पोखरा हार्डवेयर एसोसिएसनका अध्यक्षलगायत सम्पूर्ण टिमहरुले महोत्सवको अवलोकन गरेको संयोजक ओझाले जानकारी दिए ।
‘महोत्सव लेखनाथको संस्कृति, स्थानीय उत्पादन, विकास र सम्वृद्धि’ भन्ने मूल नाराका साथ सुरु भएको महोत्सवमा कुल ३३७ स्टलहरु रहेका छन् । ग्रामिण घरेलु प्रविधिको प्रदर्शनी र यहाँका पर्यटकीय स्थलको पहिचान गराउने उद्देश्यले आयोजना गरेको महोत्सवमा पर्यटकीय स्थलको पहिचान गराउन छुट्टै बेगनास तालको डेमो तयार गरि राखिएको छ, जुन दर्शकको आकर्षणको केन्द्र बनेको छ।
यसका साथै महोत्सवमा हस्तकला, घरेलु उत्पादन, एग्रो प्रोडक्टहरुको प्रवर्द्धन सम्बन्धी स्टलहरु, मेसिन, अटो गार्मेन्ट, माटाका भाडा, फलामका औजार प्रदर्शनीमा राखिएका छन् । त्यस्तै महोत्सवमा विद्यार्थीका लागि इन्जिनियरिङ सम्बन्धी प्रदर्शनी पनि रहेको छ । निजी क्षेत्रको छाता संस्था लेखनाथ उद्योग वाणिज्य संघ र नेपाल उद्योग वाणिज्य महासंघले आयोजना गरेको महोत्सवको पुस १८ गतेसम्म सञ्चालन हुनेछ ।
सगरमाथा इन्स्योरेन्स मुख्य प्रायोजक रहेको महोत्सवमा सहप्रायोजकमा राष्ट्रिय वाणिज्य बैंक, कृषि विकास बैंक, कामना सेवा विकास बैंकलगायत महोत्सव सफल बनाउन विभिन्न संघ संस्थाहरुले सहयोग गरिरहेका छन् ।
Discussion about this post