पोखरा २९, कार्तिक ।
हरेकजसो चुनावी सभामा कांग्रेस नेता यज्ञबहादुर थापा कास्की १ को १ मा प्रदेशसभा सदस्य उम्मेदवार दीपक कोइरालाको तारिफ गर्छन् । कोइरालाले आफ्नो पहिलो कार्यकालमा थुप्रै काम गरेको भए पनि प्रचारप्रसार नगरेकोमा गाली पनि गर्छन् । भन्छन्, ‘उनी मिजासिलो छन् । सबैसँग मिल्छन् । धेरै काम गरे पनि यो–यो गरें भन्न जान्दैनन् ।’
पूर्वमन्त्रीसमेत रहेका थापा कोइरालाले चुनाव जितेपछि प्रदेशको ‘पावरफुल’ मन्त्रालय सम्हाल्ने पक्कापक्की रहेको मतदातालाई बताउँछन् । ‘यत्तिको युवा नेता यो क्षेत्रले पाएको छ । जितेर गएपछि मन्त्री बन्छ, बन्छ,’ उनले मतदातालाई भन्ने गरेका छन्, ‘व्यवहारमा मिलनसार पनि छ, काममा परिपक्वता पनि छ ।’
घरदैलोको क्रममा उनी उमेर अनुसारको सम्बोधन र सम्मान सर्वसाधारणलाई गर्छन् । पाँच वर्ष संसदमा पुगेर नीति बनाउन खर्चिए पनि निर्वाचन क्षेत्र पूर्वाधार विकास कार्यक्रममार्फत जनतासँग प्रत्यक्षरुपमा उनी जोडिए । स्थानीय आवश्यकता पहिचान गरेर तिनलाई सम्बोधन गर्न खटिए ।
पोखरा र लेखनाथको भूगोल मिलेर पोखरा महानगरपालिका बने पनि मन मिलेको थिएन । साबिकको लेखनाथ नगरपालिकावासीले महानगरमा अपनत्व लिन सकेका थिएनन् । उनले केही योजना साबिक लेखनाथ क्षेत्रमा लैजान पहल गरे । जस्तो संक्रामक तथा सरुवा रोग अस्पताल ।
कोरोना महामारीमा पोखरा स्वास्थ्य विज्ञान प्रतिष्ठानले संक्रमितको चाप थेग्न नसक्दा साबिकको लेखनाथ लायन्स अस्पताललाई संक्रामक तथा सरुवा रोग अस्पतालमा रुपान्तरण गरियो । लेखनाथमै प्रदेशस्तरको आयुर्वेद अस्पताल बन्यो । गण्डकी विश्वविद्यालय लेखनाथमै स्थापना भयो । पोखरा र साविक लेखनाथ जोड्ने गरी विजयपुर खोलामाथि २ पुल बने । एउटा पुल निर्माणाधीन छ ।
सरकार परिवर्तन हुँदा पनि ५ वर्ष नै विषयगत समितिका सभापति हुने उनी एक्ला सांसद हुन् । उनी अर्थ तथा विकास समिति सभापति भए । त्यस क्रममा उनले मापदण्ड विपरीतका क्रसर उद्योग बन्द गराउन निर्देशन दिएका थिए । विकास, निर्माणमा पनि उनले नयाँ र सिर्जनात्मक उपायको खोजी गरे । नेपालमै पहिलोपल्ट प्राकृतिक तालमाथि झोलुंगे पुल बनाउन अग्रसरता लिए ।
रुपा तालमाथि बनाइएको झोलुंगे पुल अहिले पर्यटकीय आकर्षणको केन्द्र बनेको छ । वेगनासको जीर्ण बाँध मर्मत गरी फुट ट्र्याक बनाउन अगुवाइ गरे । फुट ट्र्याक निर्माणपछि आन्तरिक तथा बाह्य पर्यटकको आगमनमा वृद्धि भयो । भण्डारढिक रंगशालाको स्तरोन्नति, कभर्ड हल निर्माण सुरुवात, पचभैया चिडियाँखानालाई सहयोग, विभिन्न खानेपानी तथा सिंचाइ आयोजनामा उनले बजेट विनियोजन गरे ।
उनले टुक्रेभन्दा ठूलो योजनामा जोड दिए । रुपा गाउँपालिकामा ‘एक निर्वाचन क्षेत्र, एक नमुना सडक’ कार्यक्रम अन्तर्गत रिङ रोड बन्यो । रिङ रोडमा हालसम्म ३० करोड रुपैयाँभन्दा बढी खर्च भइसकेको छ । वेगनासदेखि भोर्लेटार जोड्ने सडक कालोपत्र गर्न १० करोड रुपैयाँभन्दा बढी विनियोजन भयो ।
रुपा गाउँपालिकाका अधिकांश बाटा प्रदेशकै बजेटबाट बनेका छन् । कांग्रेस सहमहामन्त्री जीवन परियार आफ्ना पूर्व प्रतिस्पर्धी दीपक कोइरालालाई जिताउन खटिएका छन् । भन्छन्, ‘अब पालो युवाकै हो ।’ उम्मेदवार कोईराला आफै पनि भन्छन् – ‘मलाई भोट हाल्दा कसैले हार्नु पर्दैन ‘ ।
Discussion about this post