रामशरण नेपाली
लेखनाथ, १९ कार्तिक ।
यहि मंसिर ४ गते हुने प्रतिनिधि सभा र प्रदेश सभाको निर्वाचनमा कास्की क्षेत्र नं. १ का आकांक्षी उम्मेद्वारहरुविच परिचयात्मक एवं प्रतिबद्धता घोषणा कार्यक्रम शनिबार सम्पन्न भएको छ ।
जागरुक नागरिक समाज पोखरा–२६ ले आयोजना गरेको उक्त कार्यक्रममा पाँचदलीय गठबन्धनको तर्फबाट प्रदेश सभा सदस्य पदका उम्मेदवार बनेका दिपक कोईरालाले गत पाँच वर्षमा आफुले पुरा गर्न नसकेका कामहरु पुरा गर्नलाई यसपटक पनि मत दिएर विजयी गराउन अनुरोध गरेका छन । उनले लेखनाथ क्षेत्रका विभिन्न ठाउँहरुमा प्रदेशसरकार मार्फत विभिन्न विकास निर्माणका कार्यहरु भएको र ति पर्याप्त नभएपनि कम्तीमा आफुले शुरुवात गर्न सकेकोमा खुशी व्यक्त गरे ।
यस्तै गठबन्धनबाट प्रतिनिधिसभाका उम्मेद्वार किशोरदक्त बरालले आफु विजयी भएको खण्डमा राजनीती आग्रह पुर्वाग्रहबाट माथी उठेर क्षेत्र नं. १ को विकास गर्ने प्रतिवद्धता व्यक्त गरेका थिए । उनले एमालेले दुईतिहाई बहुमतको सरकार चलाउन नसकेका कारण अब निर्वाचनपछि गठबन्धनको सरकार बन्ने दाबी गरे ।
उक्त अवसरमा नेकपा एमालेको तर्फबाट प्रतिनिधि सभा सदस्य पदका उम्मेदवार मन बहादुर गुरुङ्गले आफना २० प्रतिबद्धताहरुको ग्यारेण्टी गर्ने वताउँदै आफुलाई मत दिएर विजयी गराउन आग्रह गरेका थिए । उनले आफु विजयी भएको खण्डमा यो पार्टी त्यो पार्टी नभनी जनताको भावनालाई कदर गर्दै क्षेत्र नं. १ को विकास गर्ने वताएका थिए ।
कार्यक्रममा मंगोल नेशनल अर्गनाईजेशनका यज्ञ बहादुर गुरुङ्ग, स्वत्न्त्र उम्मेदवार सौगात जिसी, राप्रपाका बाबुराम थापा, नेमकिपाका राजेन्द्र माथ, स्वतन्त्र उम्मेद्वार विश्वराज पौडेल, राप्रपाका डा. महेन्द्र बहादुर कार्की, हाम्रो नेपाली पार्टीका मदन केसी र प्रमोद आचार्य, जसपाका रामकार्जी चर्माकार, स्वतन्त्र उम्मेदवार नवराज पौडेल, एकिकृत शक्ति नेपालकी सबिना बेगम, नेकपा समाजवादीका तुल बहादुर सिञ्जाली, प्रतिनिधि सभा सदस्य पदकी उम्मेदवार गौमती गुरुङ्ग लगायतले आफ्ना चुनावी प्रतिबद्धताहरु व्यक्त गरेका थिए ।
संस्थाका अध्यक्ष रामहरी ढुंगनाको अध्यक्षतामा सम्पन्न भएको कार्यक्रममा उपाध्यक्ष एल पि ढुंगानाले स्वागत गरेका थिए भने कार्यक्रमको सञ्चालन नेपाल पत्रकार महासंघ कास्की शाखाकी अध्यक्ष बिमला भण्डारीले गरेकी थिईन ।
Discussion about this post