स्थगित लेखनाथ महोत्सव फागुन २६ बाट चैत्र ७ सम्म हुने

रामशरण नेपाली
फागुन ११, लेखनाथ ।
लेखनाथ उद्योग वाणिज्य संघको आयोजनामा बिगत १८ वर्षदेखि कास्कीको लेखनाथमा हुँदै आएको लेखनाथ महोत्सवको १७ औं संस्करण यहि फागुन २६ गतेबाट चैत्र ७ गतेसम्म हुने भएको छ ।

यस अगाडि माघ १३ गतेदेखि २४ गतेसम्म सञ्चालन हुने भनिएको महोत्सव कोरोना महामारीको कारण देखाउँदै प्रशाासनले रोक लगाएपछि स्थगित भएको थियो । हाल समय अनुकुल भएसँगै महोत्सव फागुन २६ गते बाट सञ्चालन गर्न लागिएको बुधबार आयोजित पत्रकार सम्मेलनमा संघका अध्यक्ष छत्रधर आत्रेयले जानकारी दिए ।

‘महोत्सव लेखनाथको संस्कृति, स्थानीय उत्पादन, विकास र सम्बृद्धि’ भन्ने मूल नाराका साथ लेखनाथ उद्योग वाणिज्य संघ र नेपाल उद्योग वाणिज्य महासंघको संयुक्त आयोजना, गण्डकी प्रदेश पर्यटन उद्योग वाणिज्य तथा आपूर्ति मन्त्रालय, पोखरा महानगरपालिका कार्यालय, नेपाल उद्योग वाणिज्य महासंघ गण्डकी प्रदेशको सहआयोजना, नेपाल पर्यटन बोर्डको प्रवद्र्धन तथा विभिन्न संघ संस्थाहरुको सहयोग र सहभागितामा महोत्सव गर्न लागिएको हो ।

नेपाल इको प्यानलको मुख्य प्रायोजन र राष्ट्रिय वाणिज्य बैंकको सह–प्रायोजन रहने महोत्सवको मुख्य उद्देश्य कोभिड १९ को कारणले थला परेको अर्थतन्त्रलाई चलायमान बनाई यस क्षेत्रको आर्थिक गतिविधि बढाउने रहेको महासचिव उपेन्द्रराज सुवेदी राजुले बताए । ‘औद्योगिक उत्पादन तथा हस्तकलाका सामानहरुको बजार प्रवद्र्धन, सोको पहिचान, स्थानीय उत्पादन, लघु, घरेलु तथा साना उद्योगहरुको प्रवद्र्धन, आवश्यक ज्ञान, सिप, उद्यमशिलता र प्रविधि हस्तान्तरण, राष्ट्रिय तथा अन्तराष्ट्रिय मुलुकहरुमा उत्पादित औद्योगिक एवं दैनिक उपभोग्य वस्तु तथा सेवाहरुको प्रवद्र्धन, जातीय भेषभुषा, कला संस्कृति, रितिरिवाजको जगेर्ना, आन्तरिक एवं वाह्य पर्यटकहरु आकर्षण गरि आन्तरिक पर्यटनलाई सहयोग पुर्याउने महोत्सवको मुख्य उद्देश्य हो,’ उनले भने ।

साहित्यिक कार्यक्रम, महिला विशेष कार्यक्रम, विद्यालय स्तरिय कार्यक्रम, सास्कृतिक कार्यक्रम, आदीबासी जनजाति विशेष कार्यक्रम, कृषि तथा पशुपंक्षी प्रदर्शनी, सूचना प्रविधि प्रदर्शनी, शैक्षिक प्रदर्शनी, हस्तकला प्रदर्शनी, जातजातिहरुको सम्मानमा लोप हुन लागेका रितिरिवाज तथा संस्कृति झल्कने उत्कृष्ट नृत्य प्रदर्शनी, आदिबासी जनजाति तथा आमा÷महिला समूहहरुको आफ्नो झाँकी र्याली तथा भेषभुषा प्रदर्शनी, ख्याती प्राप्त हास्य व्यंग्य कलाकारहरुको दैनिक प्रस्तुती, बाल उद्यान, खाना महोत्सव, राष्ट्रिय लोक दोहोरी कार्यक्रम, युवाहरुको इच्छालाई लक्षित गर्दै लाइभ म्युजिक कन्सर्ट लगायतका कार्यक्रम पनि महोत्सवमा समावेश गरिएको संघका द्धित्तीय उपाध्यक्ष एवं प्रचारप्रसार संयोजक गोपीचन्द्र बाँस्तोलाले जानकारी दिए ।

पत्रकार सम्मेलनमा नेपाल पत्रकार महासंघ कास्कीका उपाध्यक्ष रामप्रसाद तिमिल्सीनाले आयातित बस्तुहरुको खरिद बिक्रिको अलवा कृषिमा आधारीत उत्पादनलाई प्रथामिकता दिदै कोभिडका कारणले थला परेको अर्थतन्त्रलाई चलायमान बनाउदै पोखरा तथा गण्डकी प्रदेश क्षेत्रको आर्थिक गतिविधि बढाउन महोत्सव सहयोगी हुनु पर्ने सुझाव व्यक्त गरेका थिए ।

लेखनाथ महोत्सव २०७८ का कार्यक्रमहरुलाई व्यवस्थित रुपमा संचालन गर्नका लागि ८ सदस्यीय निर्देशक समिति, ४१ सदस्यीय महोत्सव सल्लाहकार समिति, १९२ सदस्यीय कार्यसम्पादन समिति गठन गरिएको छ । करिब ३०० स्टल रहने यस महोत्सवमा करिब २ लाख पचास हजार दर्शकले मेला अवलोकन गर्ने र करिब १० करोड बरावरको आर्थिक कारोबार हुने अपेक्षा गरिएको छ । महोत्सवमा करिब १ करोड ५ लाख आम्दानी हुने र महोत्सव सम्पन्न गर्नका लागि करिब ९० लाख खर्च भई रु १५ लाख बचत हुने अनुमान गरिएको छ ।

महोत्सवको बचतवाट प्रदर्शनी स्थल र संघको भवनको स्तर उन्नती, औद्योगिक क्षेत्र निर्माणको लागि पहल एवं सहयोग, कवि शिरोमणि लेखनाथ पौड्यालको जन्मस्थल विकास, पर्यटन विकासतर्फ बेगनासतालमा बराह मन्दिर संरक्षण, लेखनाथ उद्योग वाणिज्य संघको रजत वर्षको सन्दर्भमा बेगनासताल परिसरमा एक उत्कृष्ट स्तरको डिस्प्ले बोर्ड निर्माण लगायतका विभिन्न सामाजिक उत्तरदायित्वका कार्यमा खर्च गरिने बताइएको छ ।

संघका अध्यक्ष छत्रधर आत्रेयको अध्यक्षतामा भएको कार्यक्रममा धन्यवाद ज्ञापन वरिष्ठ उपाध्यक्ष विनोद श्रेष्ठ र कार्यक्रम संचालन महासचिव उपेन्द्रराज सुवेदी(राजु) ले गरेका थिए ।