तनहुँमा हर्षाेउल्लास सहित तमु ल्होसार मनाईँदै

दुलेगौडा । गुरुङ समुदायले नयाँ वर्षलाई स्वागत गर्दै आज बुधबार ल्होसार’ पर्व मनाउँदैछ । ‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘ल्होसार’ भनिएको हो ।

यो पर्व सूर्यको किरणसँग पनि सम्बन्धित छ । गुरुङ बाहुल्य रहेको लमजुङ, गोरखा, तनहुँ, स्याङ्जा, मनाङ, कास्की, पर्वत लगायत जिल्लामा सूर्यको ताप पहिले आउने भएकाले पुस १५ गते यो पर्व मनाउने गरिएको विश्वास गरिन्छ । यसपछि क्रमशः तामाङ र शेर्पा जातिको बसोबास भएको क्षेत्रमा सूर्यको ताप आउने भएकाले माघ र फागुनमा तामाङ्ग र शेर्पा समुदायले यो पर्व मनाउने गरेका छन् ।

तमु ल्होसारका अवसरमा तनहुँका विभिन्न स्थानमा कार्यक्रम गरेर ल्होसार मनाएदै आएको भएता पनि यस बर्ष भने औपचारिक कार्यक्रमहरु कतै पनि आयोजना नभएको तमू ह्युला छोँज धि गुरुङ्ग राष्ट्रिय परिषद तनहुँका अध्यक्ष खेमराज गुरुङ्गले जानकारी दिए । उनले कोरोना महामारीका कारण यस बर्ष कार्यक्रम गर्ने कुनै पनि निर्णय नभएको जानकारी दिदै परिवार परिवारमा मनाउन आग्रह गरिएको बताए ।
विभिन्न इकाईहरुमा पनि आपसमा भेला भएर सामुहिक रुपमा ल्होसार मनाउने तयारी भएको उनलेको बताए । यसरी आयोजना गरिएको कार्यक्रममा भिडभाड कम गर्न तमु ह्युला छोँज धि तनहुँले आग्रह समेत गरेको छ ।

जिल्लाको शुक्लागण्डकी नगरपालिकाको वडा न १२ फिरफिरे गुरुङ्ग समुदायका बाक्लो बसोबास रहेको वडा हो । यहाँ आज विभिन्न गाउँमा रहेको गुरुङ्ग समुदायले एक स्थानमा सहभागि भई सामुहिक ल्होसार मनाउँदैछन् । वडा न १२ का वडाध्यक्ष मनराज गुरुङ्गले आफुहरुको समुदायको सबैभन्दा महान्पर्वको रुपमा रहेको तमु ल्होसारको महत्व बढाएर तमु समुदाय विचको आपसी सम्वन्ध प्रगाढ बनाउने उदेश्यले सामुहिक ल्होसारको कार्यक्रम गर्ने निर्णय गरिएको बताए ।

ल्होसारको अवसरमा फिरफिरेमा रहेका तमु समुदायलाई आठ समुदायमा विभाजन गरि मौलिक खाना र संस्कृती जोगाउने गरि कार्यक्रम गरिने गुरुङ्गले बताए । वर्षलाई १२ वटा जीवजन्तुको प्रतीकका रुपमा लिइने चलनअनुसार मनाउन लागेको यो पर्वको गुरुङ जातिको आफ्नो छुट्टै मौलिक परम्परा र इतिहास बोकेको पर्व रहेको छ ।

ल्होसारको अवसरमा गण्डकी प्रदेश सरकारले आज सार्वजनिक विदाको घोषणा गरेको छ । तमु समुदायको बाहुल्यता रहेको गण्डकी प्रदेशमा आज विद्यालय, सरकार कार्यालय लगायत बन्द रहनेछन् । गण्डकी प्रदेशमा कुल जनसंख्याको झण्डै ९ प्रतिशत गुरुङ्ग समुदाय बसोबास रहेको छ ।