अशोक विश्वकर्मा, भिमाद । ग्याङ्ग फाइटमा घाइते भएका भनिएका भिमादका उदय नेपाली घटना स्थलबाट नै एकाएक लापत्ता भएपछि घटना रहस्यमय बनेको छ । गत २२ गते म्याग्दे गाउँपालिकाका ५ मा रहेको खनाल बाजे रिसोर्टमा साथीहरुसँगै रक्सी खाएपछि सामान्य विवाद भएको थियो ।
होटलमा सामान्य झगडा भएर बाहिर निस्किएका उदयलाई छाङ्गपाटनका केकी युवा र स्थानीयले कुटपिट गरेका थिए । होटल बाहिर भएको झगडामा युवाहरु र स्थानीयको कुटाईबाट गम्भिर घाइते भएका नेपाली हालसम्म बेपत्ता छन् । उनले प्रयोग गर्दै आएका मोटर साइकल घटना स्थलमा नै फेला पर्नु र फोन समेत सोही दिन देखि प्रयोगमा नआएको पाइएपछि प्रहरी अनुसन्धान नै अलमलमा परेको छ ।
घटना घटेको लामो समयसम्म पनि बेपत्ता भएका नेपालीको अवस्था अज्ञात भएपछि प्रहरी सहित घर परिवार चिन्तित बनेको छ । सेती नदीको किनार नजिकै झगडा भएको हुदाँ प्रहरीले नदी वरपर खोजी तिव्र पारेको छ भने नेपालीको आफन्तहरुमा पनि जानकारी लिइसकेको प्रहरी निरिक्षक जगदिश रेग्मीले जानकारी दिनुभयो ।
नेपालीको घर परिवारले भने उदयलाई मारेर फालेको हुनसक्ने भन्दै छानविन फितलो पारेको दावि गर्दै आएका छन । उदयकी सानी आमा दिना गोतामेका अनुसार वेपत्ता युवालाई षडयन्त्र पुर्वक बेपत्ता पारिएको छ । “हामीले जताततै खोज्यौँ कतै पाएका छैनौँ” उहाँले भन्नुभयो “हाम्रो बाबु विना नै घटनाको मिलापत्र हुनुलाई कसरी बुझ्न सकिन्छ, त्यो प्रष्टै छ ।”
गोतामले घटना स्थलमा गम्भिर घाइते भएर हिड्न नसक्ने अवस्थामा पुगी सकेको जानकारी आफुले पाएको बताउनुभयो । एक प्रत्यक्षदर्शी स्थानीयले उदयलाई युवाहरुले बेल्चाले समेत प्रहार गरेका थिए । रक्ताम्य अवस्थामा सिमलको रुख नजिकै राखिएको उनको भनाई छ ।
घटना रहस्यमय बन्दै गएपछि प्रहरीले घटनामा संलग्न उदय नेपालीका साथीहरु सहित अन्य १६ जनालाई नियन्त्रणमा लिएको छ ।
घटना अनुसन्धानको भईरहेको इलाका प्रहरी कार्यालय भिमादका सहायक प्रहरी निरिक्षक सुरज सदाशंकरले जानकारी दिनुभयो । साथीहरुसँगको सामान्य विवाद पछि रिसोर्ट रहेको स्थान छाङपाटनका युवाहरुले समेत उदयलाई कुटपिट गरेका थिए ।
प्रहरीका अनुसार घटनामा संलग्न रहेका युवाहरुले उदयलाई रिसोर्टको झगडामा सामान्य कुटपिट भएपनि पछिल्लो घटनामा संलग्न नभएको दावि गर्दै आएका छन् ।
Discussion about this post