तनहुँ खबर संबादाता
कार्तिक २४,दमैली
पछिल्लो समयमा भाईरल बन्दै गएको तनहुँको मानहुँकोटमा सामान्यतया दैनिक ३ सय जना पर्यटकलाई मात्र दृश्यावलोकनका लागि प्रवेशानुमति प्रदान गर्ने निर्णय भएको व्यास नगरपालिकाका प्रवक्ता मोहनकुमार श्रेष्ठले जानकारी दिनुभयो ।
कोरोना महामारीको बिचमा पनि अत्याधिक मानिसहरुको चाप बढेसंगै संक्रमण जोखीम न्युविकरणका लागि उक्त निर्णय गरीएको हो । मानहुँकोट जाने पर्यटकहरुलाई अनिवार्य रुपमा नाम दर्ता गरी स्वास्थ्य, सुरक्षासम्बन्धी मापदण्डको पूर्णरुपमा पालना गरेर दृश्यावलोकनका लागि प्रवेश गराउने व्यवस्था मिलाउन सम्बन्धित वडा कार्यालयलाई निर्देशन दिने निर्णय गरिएको नगर प्रवक्ता श्रेष्ठले जानकारी दिनुभयो ।
पर्यटकीय स्थलको रुपमा परिचत मानहुँकोटमा जग्गा खरिद बिक्री गर्न रोक लगाइएको व्यास नगर कार्यपालिकाको बैठकले निर्णय गरेको हो । मानहुँकोटको मौलिकताको संरक्षणका लागि गुरु योजना निर्माण गरिने भएको छ । कात्तिक २४ गतेदेखि लागु हुने गरी गुरु योजना निर्माण हुने अवधि पुस मसान्तसम्म मानहुँकोट क्षेत्रको जग्गा रजिष्टे«सन पाससम्बन्धी कार्यको सिफारिस बन्द गर्ने निर्णय गरिएको श्रेष्ठले जानकारी दिनुभयो ।
पर्यटकीय गन्तव्यको रुपमा रहेको मानहुँकोटमा पछिल्लो समय आन्तरिक पर्यटकहरुको आगमनमा उल्लेख्य बृद्धि भएकाले व्यवस्थापकीय पक्षको विकासका लागि गुरुयोजना निर्माण गर्ने भएको नगर प्रमुख वैकुण्ठ न्यौपानेले बताउनुभयो । मानहुँकोटको मौलिकता संरक्षण गर्न तत्काल गुरुयोजना निर्माण गर्ने, खानेपानी विस्तृत परियोजना निर्माण गर्नका लागि सो कार्यका लागि पाँच लाख रुपैयाँ विनियोजन गर्ने निर्णय गरिएको नगर प्रमुख वैकुण्ठ न्यौपानेले बताउनुभयो ।
मानहुँकोट परिसरभित्र सार्वजनिक शौचालय निर्माण लगायतका अन्य अत्यावश्यक भौतिक संरचना निर्माण गर्न तत्काल नगरपालिकाले २५ लाख रुपैयाँ विनियोजन गरी निर्माण भएको छ । साथै, अत्यावश्यक संरचना निर्माणका लागि विभिन्न संघ संस्थाहरुसंग साझेदारीका लागि प्रस्ताव आह्वान गर्ने निर्णय समेत गरिएको नगर प्रमुख न्यौपानेले बताउनुभयो ।
Discussion about this post