गरीबी र बेरोजगारी हटाउन शान्ति आवश्यकः प्रदेश प्रमुख

पोखरा । नेपाल पर्वतारोहण संघद्वारा पोखरास्थित अन्तर्रााष्ट्रय पर्वतीय संग्रहालयमा मंगलबारदेखि विश्वशान्ति पूजा शुरु भएको छ ।
विश्वशान्ति पूजा उद्घाटन गर्दै गण्डकी प्रदेश प्रमुख अमिक शेरचनले बौद्ध दर्शनलाई व्यावहारिक रुपमा अनुशरण र कार्यान्वयन गर्न सके त्यसले विश्वमा शान्ति स्थापना गर्न सकिने बताए । उनले मुलुकमा व्याप्त गरीबी र बेरोजगारी जस्ता समस्या समाधानका लागि समेत शान्ति आवश्यक रहेकोमा समेत जोड दिए ।
प्रदेशसभा सदस्य इन्द्रधारा विष्टले चोखो मनले गरिने हरेक गतिविधिले विश्वमा शान्ति एवं समृद्धि प्राप्त गर्न सहयोग पुग्ने बताउँदै बौद्ध दर्शनलाई आत्मसात गर्नुपर्ने बताए ।
विश्वशान्ति पूजा आयोजक समिति संयोजक हरिध्वज तुलाचनले पूजाले राष्ट्रिय एकता कायम गर्न प्रेरणा दिने बताउँदै एक मानवले अर्को मानवलाई सहयोग गर्नुपर्नेमा जोड दिए ।
कार्यक्रममा पर्यटन विभागका मीरा आचार्य, शान्ति पूजा आयोजक समितिका सहसंयोजक राजेन्द्र सापकोटा, पोखरा पर्यटन परिषद्का अध्यक्ष चिरञ्जीवी पोखरेल, नेपाल पर्वतारोहण सङ्घका दिनेश गुरुङ, पोखरा १७ का वडाध्यक्ष तीर्थराज अधिकारी लगायतले विश्वमा शान्ति स्थापना गर्न यस्ता धार्मिक कार्यक्रमले महत्वपूर्ण भूमिका निर्वाह गर्ने धारणा राखे ।
रिन्पोछे महायोगी श्रीधर राणासहित ६० बढी लामा गुरुबाट शान्ति कामनासहित गरिने प्रवचनमा ५ सय भन्दा बढी बुद्ध दर्शनसँग सम्बन्धित पुस्तक वाचन गरिनेछ । यसअघि लुम्बिनीबाट ल्याइएको शान्तिदीप प्रदेश प्रमुख शेरचनले लिएर शान्ति ¥यालीमा सहभागी बनेका थिए ।
पूजा अघि पोखराको हल्लनचोकबाट शुरु भएको शान्ति¥याली पोखराको विभिन्न भाग परिक्रमा गरी पर्वतीय संग्रहालयमा पुगेर सभामा परिणत भएको थियो ।
¥यालीमा सहभागी आमा समूह, टोल विकास संस्था, लामा गुरु, जनप्रतिनिधिले बुद्ध दर्शनका पुस्तक कङ्ग्युर तथा तेन्ग्यूर टाउकोमा राखेर शान्तिको सन्देश दिएका थिए । कार्यक्रम ३ दिनसम्म चल्नेछ ।