बाँदर धपाउन पड्काएको भरुवा बन्दुकको छर्रा लागेर एक युवकको ज्यान गएको छ ।
मोलुङ गाउँपालिका ३ को थुम्किमा बाँदर धपाउन पड्काएको भरुवा बन्दुकको छर्राले लागेर १७ वर्षीय लालमान तामाङको ज्यान गएको हो । बन्दुक छर्राले लागेर गम्भीर घाइते हुनुभएका तामाङलाई उपचारका लागि काठमाण्डौ लैजाँदै गर्दा सिन्धुलीको खुर्कोटमा ज्यान गएको प्रहरीले जनाएको छ ।
जिल्ला प्रहरी कार्यालय ओखलढुंगाका प्रहरी निरीक्षक (इन्स्पेक्टर) राजिव श्रेष्ठका अनुसार बाँदर धपाउन गएका समूहमध्येका एक २१ वर्षीय चित्रबहादुर सुनुवारलाई प्रहरीले नियन्त्रण लिएको छ । उनीसँगै गएका २२ वर्षीय सबिन सुनुवार, १७ वर्षीय पदम सुनुवार, १६ वर्षीय सुन्दर तामाङ र २२ वर्षीय रुकमान तामाङ भने फरार छन् ।
प्रहरीले दुई थान भरुवा बन्दुकसमेत नियन्त्रणमा लिएको श्रेष्ठले जानकारी दिनुभयो । घटनाबारे अनुसन्धान भैरहेको प्रहरीको भनाइ छ ।
आइतबार घर नजिकैको खेतमा बाँदर धपाउन लालमानसँगै एक समूह भरुवा बन्दुक लिएर गएको थिए । उनीहरुमध्ये एक जनाले बोकेको बन्दुक अचानक पड्किएर तामाङको देब्रे तिघ्रामा लागेपछि उहाँ गम्भीर घाइते हुनुभएको थियो ।
घटनापछि प्रहरीलाई खबर नै नगरी मृतकको शवलाई घरतर्फ लैजाँदैै गरेको सूचनाका आधारमा प्रहरीले सोमबार दिउँसो सिद्धिचरण नगरपालिका ११ को रमाइलो डाँडाबाट शव नियन्त्रणमा लिइ पोष्टमार्टमका लागि जिल्ला अस्पताल रुम्जाटार पठाएको छ ।
Discussion about this post