विकास र समृद्धिको लक्ष्य हाँसिल गर्न आवधिक योजनाले महत्वपूर्ण आधार तयार गर्छ : मुख्यमन्त्री राई

‘स्वच्छ, सुखी र समुन्नत प्रदेश’ भन्ने नारासहित प्रदेश नं. १ सरकारले प्रथम आवधिक योजना सार्वजनिक गरेको छ । मंगलबार विराटनगरमा आयोजित एक कार्यक्रमकाबीच मुख्यमन्त्री शेरधन राईले प्रथम आवधिक योजना सार्वजनिक गर्दै विकास र समृद्धिको लक्ष्य हाँसिल गर्न आवधिक योजनाले महत्वपूर्ण आधार तयार गर्ने बताउनुभयो ।

उहाँले योजना आयोगले तयार गरेको आवधिक योजनाबाट चुनौती र अवसरलाई पहिचान गर्न सजिलो हुने र तत्कालीन तथा दीर्घकालीन योजना लागू गर्न मद्दत पुग्ने विश्वास व्यक्त गर्नुभयो । प्रदेश योजना आयोगले तयार पारेको आवधिक योजनामा योजना अवधिमा लगानीका लागि चाहिने १४ खर्ब, ४२ अर्ब, ८ करोडमध्ये प्रदेश सरकारले ५ खर्ब, ५७ अर्ब, निजी क्षेत्रले ७ खर्ब, ७६ अर्ब र सहकारी क्षेत्रले ७९ अर्ब, ३० करोड लगानी गर्ने प्रक्षेपण गरिएको छ ।

कार्यक्रममा प्रदेश सांसदहरु, पालिकाका प्रमुखहरु, अर्थविद् तथा उद्योगी व्यापारीहरुको सहभागिता रहेको थियो ।