पोखरा । नेपाल रेडक्रस सोसाइटी पोखरा ३१ उपशाखाको २८ औं वार्षिक साधारण सभा शुक्रबार सम्पन्न भएको छ । सभालाई सम्बोधन गर्दै पोखरा ३१ का अध्यक्ष ढकनाथ कँडेलले कुनै सामाजिक कार्यको ठोस प्रस्ताव पेस गरेमा वडाबाट सक्दो सहयोग गर्ने प्रतिबद्धता जनाए ।
रेडक्रस सोसाइटी कास्की शाखाका कोषाध्यक्ष सन्तोष अधिकारीले पोखरा ३१ मा कुर्लुङ खोला खानेपानीलाई दीर्घकालीनरुपमा सञ्चालन गर्नुपर्ने आवश्यकता औंल्याउँदै आफूले रेडक्रस शाखाबाट सक्दो सहयोग गर्ने बताए । कास्की शाखाका सदस्य खगेन्द्र पराजुलीले रेडक्रसबारे धारणा राखे ।
उपशाखाका कार्यवाहक सभापति बबिता सुवेदीले उपशाखाको वर्तमान अवस्थाबारे चर्चा गर्दै सांगठनिक प्रतिवेदन प्रस्तुत गरेकी थिइन् । सुवेदीले विशिष्ट सदस्य थप गर्ने, महिला पाठेघर र मुटुरोगसम्बन्धी स्वास्थ्य शिविर सञ्चालन गर्ने, जनप्रतिनिधि र रेडक्रसका आजीवन सदस्यलाई विपत् व्यवस्थापनसम्बन्धी तालिम सञ्चालन गर्ने, युवा तथा जुनियर रेडक्रस सर्कललाई थप सक्रिय बनाउने, उपशाखाका आजीवन सदस्यलाई प्राथमिक उपचार सम्बन्धि तालिम प्रदान गर्ने, आपतकालीन राहत कोष व्यवस्थापनका लागि सम्बन्धित निकायसँग प्रस्ताव पेस गर्नेलगायत भावी योजना प्रस्तुत गरेकी थिइन् ।
कार्यक्रममा उपकोषाध्यक्ष द्रोणराज अधिकारीले स्वागत र उपशाखाका सचिव कृष्ण तिमिल्सिनाले सञ्चालन गरेका थिए । कार्यक्रममा कोषाध्यक्ष चिरञ्जीवी अधिकारीले आर्थिक प्रतिवेदन प्रस्तुत गरेका थिए ।
Discussion about this post