कास्की आदर्श समाज बहराईनले २२ जुलाई २०२२ शुक्रबारका दिन समाज स्थापनाको तेश्रो वार्षिकोत्सब तथा साधारण सभा भव्यताका साथ सम्पन्न गरेको छ। बहराईनकाे अदलिया स्थित नेपालीको क्लबको सभाहलमा सम्पन्न उक्त कार्यक्रमकाे सभापतित्व समाजका अध्यक्ष श्री प्रेम बहादुर क्षेत्री ज्यूले गर्नुभएको थियो भने अग्रज समाजसेवी तथा समाजका प्रमुख सल्लाहकार श्री शंकरमान गुरुङज्यू प्रमुख अतिथि रहनुभएको थियो। समाजका महासचिव देव गिरीले सञ्चालन गर्नुभएको उक्त कार्यक्रममा कास्की समाजका अग्रज अभियन्ताहरु सल्लाहकार हरु, आजिवन सदस्य हरु, साधारण सदस्य हरु लगाएत कास्की जिल्ला घर भई बहराईनमा बस्दै आएका कस्केली दाजुभाइ तथा दिदीबहिनीहरुकाे उपस्थिति रहेको थियो।
पानसमा दीप प्रज्वलन गर्दै नेपालको राष्ट्रिय गान सहित केक काटेर विधिवत रूपमा कार्यक्रमकाे उदघाटन गरिएको थियो। उदघाटन पश्चात समाजका प्रथम उपाध्यक्ष श्री पूर्ण बहादुर परियारज्यूले उपस्थित सम्पूर्ण अतिथि गणहरुलाई स्वागत गर्दै शुभकामना मन्तव्य राख्नुभएको थियो। कार्यक्रममा कोषाध्यक्ष तथा महासचिवले क्रमशः समाजको २०२१-२३ कार्यकालको पहिलो एक वर्षको आर्थिक प्रतिवेदन र कार्यप्रगति बिवरण प्रस्तुत गर्नुभएको थियो। कार्यक्रमकै बिचमा समाजको आजिवन सदस्यता ग्रहण गर्नुहुने कस्केलीहरुलाई स्वागत गर्दै आजिवन सदस्यताकाे प्रमाण पत्र प्रदान गरिएको थियो भने कार्यसमितिमा मनोनित हुनुहुने सदस्य ज्यूहरुलाई पनि प्रमाण पत्र प्रदान गरिएको थियो। कार्यक्रममा उपस्थित सम्पूर्ण महिला दिदी बहिनीहरुको तर्फबाट समाजकी महिला सदस्य श्री लक्ष्मी क्षेत्री ज्यूले शुभकामना मन्तव्य राख्नुभएको थियो भने अतिथिको रूपमा उपस्थित हुनुभएका समाजका संस्थापक सल्लाहकार श्री डिल्लीराम सापकोटा ज्यूले शुभकामना मन्तव्य राख्दै समाजले गरेका हरेक कामहरू लाई आफूले नजिकबाट नियालिरहेको र अति प्रसन्न रहेको बताउनुभएको थियो। यसरी नै आफ्नो शुभकामना मन्तव्य राख्दै कार्यक्रमका प्रमुख अतिथि श्री शंकरमान गुरुङ्ग ज्यूले समाजले स्थापना कालदेखि गरेको विभिन्न कामहरूको बारेमा प्रशंशा गर्दै आगामी दिनहरुमा पनि यसरीनै सबैजना एकताबद्ध भएर अगाडि बढ्दै जाओस भन्ने शुभेच्छा प्रकट गर्नुभएको थियो। कार्यव्यस्तता कारण छोटो समयका लागि उपस्थित हुनु भएका समाजका संरक्षक तथा वरिष्ठ समाजसेवी श्री शिवशंकर आचार्य ज्यूले तेश्रो वार्षिकोत्सबकाे शुभकामना दिँदै समाजले गरेका कामहरूले आफू अत्यन्त हर्षित भएको र समाजका लागि आफूबाट हुनसक्ने साथ सहयोग र समर्थन सदैव रहिरहने धारणा व्यक्त गर्नुभयो।
कार्यक्रमको अन्त्यमा सभापति तथा समाजका अध्यक्ष श्री प्रेम बहादुर क्षेत्रीले समाज स्थापनाको तेश्रो वार्षिकोत्सबकाे शुभकामना दिँदै प्रथम वर्ष पूरा गर्दै गर्दा समाजले हासिल गरेको सफलता र उचाईका पछाडि कार्यसमितिका सम्पूर्ण पदाधिकारी तथा सदस्य साथिहरुको समाज प्रतिको लगन निष्ठा र एकता प्रमुख रहेको वताए । सो कार्यक्रमको बारेमा संस्थाका सचिव रबी राज पौडेल ले जानकारी गराएका हुन् ।
Discussion about this post