दमौली । तनहुँको जिल्ला अस्पतालको रुपमा रहेको दमौली अस्पतालमा विरामीको चाप बढ्न थालेपछि गण्डकी प्रदेश सरकारले चार भेन्टिलेटर प्रदान गरेको छ ।
विरामीहरुको स्तरीय उपचार जिल्लामा नै सम्भव बनाउनका लागि भेन्टिलेटर प्रदान गरिएको अस्पताल प्रशासनले जनाएको छ । सघन उपचार कक्ष निर्माणको लागि गण्डकी प्रदेश सरकारले एक करोड ६९ लाख बजेट विनियोजना गरेको अस्पतालका प्रमुख डा. सुनिल पौड्यालले जानकारी दिनुभयो ।
कोरोना भाईरस सङ्क्रिमतको उपचारको लागि लक्षित गरी अस्पतालमा भेन्टिलेटर सहितको आइसोलेशन कक्षा निर्माण कार्य अघि बढाउने क्रममा ति उपकरण प्राप्त भएको उहाँल बताउनुभयो ।
जिल्ला अस्पतालमा सघन उपचार कक्ष सञ्चालन गरि सेवा प्राप्त हुने भएपछि यहाँका विरामीहरु अन्यत्र जानुपर्ने बाध्यता हट्ने विस्वास लिइएको छ । यस अघि अस्पतालमा सघन उपचार कक्ष नहुँदा पोखरा, भरतपुर वा काठमाडौ पुगेर स्वास्थ्य सेवा लिनुपर्ने समस्या रहके थियो ।
कोरोना संक्रमितहरुको संख्या बढ्दै जाँदा दमौलीमा अस्पतालको पूर्वाधार विकासमा समेत जोड दिइएको छ । अस्पताल परिसरमा रहेको पुरानो भवनलाई आइसोलेशन भवनको रुपमा विकास गर्ने तयारी भईरहेको अस्पताल ब्यवस्थापन समितिका अध्यक्ष प्रदीपराज अधिकारीले बताउनुभयो ।
अधिकारीले पूर्वाधार विकासका लागि केन्द्र सरकार मार्फत दुई करोड बजेट प्राप्त भएको जानकारी दिदै सोही अनुसार पूर्वाधार विकास गर्ने चरणमा रहेको बताउनुभयो । उहाँका अनुसार अस्पताललाई चार भेन्टिलेटर सहितको दश शैया क्षमताको बताउने तयारी छ ।
केही समय अघि मात्रै अस्पतालले दन्तसेवाका लागि डिजिटल एक्सरे मेसिन सञ्चालनमा ल्याइएको छ । दाँतको उपचारका सहज बनाउन उक्त मेसिन खरिद गर्न स्वास्थ्य तथा जनसंख्या मन्त्रालयले रकम उपलब्ध गराएपछि डिजिटल एक्सरे मेसिन सञ्चालनमा ल्याएको दन्तरोग विशेषज्ञा डा.सुनयन सुवेदीले जानकारी दिनुभयो । उक्त मेशिनलाई करीब रु ५० लाख पर्ने अस्पतालले जनाएको छ ।
यस्तै गरी स्वास्थ्य तथा जनसङ्ख्या मन्त्रालयकै सहयोगमा सुत्केरी सेवाको एनेस्थेसिया उपकरण प्राप्त भई सेवा सुरु भईसकेको छ । बिरामीलाई पूर्णतः बेहोस बनाउने उपकरण हो । बिना अक्सिजन शल्यक्रिया गर्न सकिने २० लाख रुपैयाँ बराबरको उक्त उपकरण गण्डकी प्रदेशको दमौली सहित स्याङ्जा जिल्ला अस्पताललाई पनि हस्तान्तरण गरिएको थियो ।
उक्त उपकरण जडान गरिएपछि विशेषतः अस्पतालमा सुत्केरी गराउने महिलालाई सहज रुपमा सेवा प्रवाह गर्न सकिने दमौली अस्पतालका प्रमुख डा.पौड्यालले जानकारी दिनुभयो ।
व्यवस्थापन समितिले जनशक्ति, ल्याब सामग्री खरिद तथा कर्मचारी आवास कार्यक्रमका लागि निक साइमनसँग ५० लाख रुपैयाँ बराबरको सम्झौता समेत गरेको छ । आकस्मिक कक्ष, सुत्केरी कक्ष, प्रयोगशालाका लागि आवश्यक उपकरण लगायत खरिदका लागि सम्झौता गरिएको समितिले जनाएको छ ।
समितिका अनुसार अस्पतालले निकट भविष्यमै थाइराइडको पनि उपचार शुरु गर्न लागेको छ । त्यसका लागि एक जना प्राविधिक आवश्यक पर्ने भएकाले सोको पनि निक साइमनसँग सम्झौता गरिएको छ । त्यस्तै फिजियोथेरापी सेवा शुरु गर्नका लागि एक जना चिकित्सक, फार्मेसी व्यवस्थापनका लागि बि फार्मेसीको माग गरिएको छ । दमौली अस्पतालमा तनहुँका अतिरिक्त कास्कीको पूर्वि भेग, लमजुङ र गोरखाको दक्षिणी भेगका नागरिकहरु उपचारको लागि आउने गर्छन् ।
Discussion about this post