पूर्व भूमिसुधारमन्त्री गौतमको निधन

दमैली ।। समाजवादी जनता पार्टीका नेता एवं पूर्व भूमिसुधार तथा व्यवस्था मन्त्री भिमप्रसाद गौतमको निधन भएको छ। निमोनिया र सुगरका विरामी गौतमलाई चितवन मेडिकल कलेजबाट निमोनियाको उपचार गराएर घरमा ल्याईएको थियो । बिहीबार विहान बन्दीपुर गाउँपालिका वडा नं.१ पिप्ले स्थित आफ्नै निवासमा ७१ वर्षको उमेरमा निधन भएको हो ।

समाजवदी जनता पार्टीका केन्द्रीय सल्लाहकार गौतम बाबुराम भट्टराई प्रधानमन्त्री हुँदा भूमिसुधार तथा व्यवस्था मन्त्री रहेका थिए । बाबुराम भट्टराईले समाजिक सञ्जालमा स्वर्गिय गौतम सामाजिक आन्दोलनका एउटा अथक योद्धा भएको उल्लेख गर्नु भएको छ । साथै भट्टराईले देश र जनताको पक्षमा निस्वार्थ गर्दै आएको उल्लेख गर्नु भएको छ ।

नेता गौतम जिल्लामा किसानहरुका प्रिय नेताको रुपमा परिचित हुनुहुन्थ्यो । बन्दीपुर गाउँपालिकाका अध्यक्ष पूर्णसिंह थापाले नेता गौतम परिवर्तनको योद्धा भएको बताउनुहुन्छ । ‘कम्युनिष्टको धरोहर, हाम्रो अभिभावक, राजनैतिक गुरु र विकासप्रेमी नेतालाई गुमाएका छौं ।’ अध्यक्ष थापाले भन्नुभयो ।

धार्मिक स्थल तनहुँको देवघाटमा गौतमको अन्त्येष्टि गरिने पारिवारिक श्रोतले जनाएको छ । उहाँको निधनप्रति समाजवादी जनता पार्टी, विभिन्न पार्टीका नेताले दुःख व्यक्त गरेका छन् । नेपाली काँग्रेसका वरिष्ठ नेता रामचन्द्र पौडेलले फरक विचार र पार्टीका भएर पनि मेरो अन्त्यन्त हितैशी, शुभचिन्तक गौतमको निधनले अत्यन्तै मर्माहत बनाएको बताउनुभएको छ । संविधान निर्माणको क्रमा उहाँ निकै उपयोगी सल्लाह र सुझाव प्रस्तुत गर्नु भएको स्मरण गर्दै पौडेले शोक वक्तव्यमा विकासवादी नेता भएको र उहाँको निधनले देशले एउटा असल नेता गुमाएको उल्लेख गर्नु भएको छ ।