वीरगन्ज, कात्तिक ६ । भारतीय पक्षले एकपक्षीयरुपमा बिहीबार वीरगन्ज नाका खोलेपछि सीमाक्षेत्रमा तनाव सिर्जना भएको छ ।
दुई देशको सीमामा रहेको रक्सौल भन्सारले बिहान ६ बजेदेखि नाका खुला गरेपछि भारतबाट नेपालतर्फ आउनेलाई नेपाली सुरक्षाकर्मीले रोक्दा सीमाक्षेत्रमा तनाव सिर्जना भएको हो ।
कोरोना संक्रमणका कारण गएको चैत ११ गतेदेखि बिनाअनुमति सर्वसाधारणलाई नेपाल भित्रन रोक लगाइएकामा भारतीय पक्षले नाका खोलेपछि भारतबाट नेपाल भित्रन ठूलो संख्यामा सर्वसाधारण सीमाक्षेमा जम्मा भएका छन् ।
विभिन्न निजी सवारी-साधनमा सवार सयौँ व्यक्ति वीरगन्जको मितेरीपुलमा जम्मा भएपछि उनीहरुलाई रोक्न नेपाली सुरक्षाकर्मीलाई हम्मे-हम्मे परेको छ ।
पर्साका प्रमुख जिल्ला अधिकारी आस्मान तामाङले यही कात्तिक ३० गतेसम्म सीमानाकाबाट आवागमन बन्द राखिने नेपाल सरकारको निर्णय भएकाले सोको कार्यान्वयन हुने बताउनुभयो ।
प्रजिअ तामाङले औपचारिकरुपमा कोही नेपाली नागरिक भारतबाट नेपाल आउन चाहन्छन् भने स्थानीय प्रशासनको अनुमति लिएर शंकराचार्य गेटको नाका भएर आउनसक्ने बताउनुभयो ।
नेपालतर्फको नाकामा नेपाली सुरक्षाकर्मीले रोकेपछि बिहीबार बिहान भारतीयहरुले रक्सौल इन्धन लिन गएका नेपाली ट्यांकरलाई मितेरीपुलमा केहीबेर अवरोध पनि गरेका थिए ।
बडादशैं, दीपावली, सोहोरहिया र छठ पर्वलाई मध्यनजर गर्दै भारत सरकारले नेपालसँग सीमा जोडिएका स्थल नाका बिहीबारदेखि खोलेको हो ।
Discussion about this post